傅家俊 馬會搞素食婚宴

傅家俊 馬會搞素食婚宴
【明報專訊】有「神奇小子」之稱嘅桌球手傅家俊，今個月底小登科，將會喺沙田馬場擺酒。由於佢同未婚妻兩家人都食齋，所以要求馬會設計一份全新素食餐單，係馬會第一次搞全場食齋嘅婚宴。總廚話好多人以為食齋好cheap，但其實唔少素食食材好似靚竹笙、黑松露都好矜貴，隨時貴過食肉。
入廚27年嘅馬會總廚師長（馬場—中菜）林雲輝話，齋鹵味、芋頭魚呢啲齋舖成日見嘅菜式添加劑太多，唔擺得上大場面，所以要喺天然食材上花工夫。
素食食材隨時貴過肉
今次婚宴除咗要滿足主人家要求，林師傅話最大挑戰係要賓客食得開心。菜單入面用咗好多菇菌類食材，其中猴頭菇仲係傅家俊指定，「呢啲食材唔係就咁滾水煮埋就食得，事前要用素湯燜，再加秘製醬汁煮。」
素湯係全個婚宴嘅精華，用大豆、紅棗、豆腐同冬菇椗熬足幾個鐘，再用嚟煮菇菌先出味。林師傅話煮齋比一般菜式棘手﹕「燉湯唔可以放嚿肉落去，但又怕淡而無味。」
除咗齋菜婚宴，馬會都有提供近年流行嘅無魚翅婚宴，同埋根據世界自然基金會指引嘅環保海鮮餐單。嚟緊星期日馬會喺跑馬地馬場搞婚宴展覽，歡迎準新人參觀。